A Letter to You 💌

致各位親愛的顧客：

FCPlus 將於 11 月 25 日起暫停營業。
品牌經營到第 11 年，真心多謝大家一路以來的支持。

經過多重思考，考慮到自己身心的狀態，休息應該係呢刻我最需要做嘅事。好多不捨與感受，依然留喺內心深處。

創立品牌嘅時候，我仲係一個入世未深嘅細路女。
靠住一股衝動與衝勁，本住「我要每個肥妹都有靚衫着！唔使再買啲唔啱身嘅衫！」嘅信念，決定開創大碼女裝品牌，為大家嘅穿搭提供多一個選擇。

起初由 IG shop 做起，當時用 #hkplussize 嘅 post 只有我一個。
我都懷疑過：究竟會唔會成功？

直到收到第一張單嗰刻，我即刻感動到想喊。
開業大約一年後，品牌獲得不同媒體嘅報道，令 Fashion Corner Plus 嘅知名度打開。
之後開始租場地、參加市集，比大家可以摸質地、試衫。
再一步一步，到有咗屬於自己嘅 studio，慢慢演變成今日嘅門市實體店。

大家嚟到門市，無論係買衫、傾偈定分享經歷，都令我有新嘅啟發。
其實除咗我自己，大家就係我嘅製作靈感。
每次出新款，我都會思考：
「你哋需要啲咩？點樣可以再提升舒適度？」
甚至會問自己：
「我追巴士會唔會揀佢？」
「有危險要走佬時會唔會着佢？😂」
聽落天馬行空，但我始終相信，衫係要融入生活。
所以我一直不斷去做改善，同追求進步。

除咗俾大家買衫，我亦希望將自己識嘅穿搭知識分享俾大家。
因為咁，慢慢建立咗一個屬於肥妹仔嘅平台。
喺呢度，大家可以冇壓力去表達自己，分享你一直唔敢問人嘅煩惱。
呢個，亦正正係大家對我嘅信任。

其實我好幸運，一直行緊喺夢想嘅路上。
呢件事，唔單止靠我個人努力，更多係大家嘅支持，同身邊人嘅鼓勵。呢啲從來都唔係必然。回顧創業至今，大家嘅 feedback、回圖、分享，都令我好開心同鼓舞。
當一件事，唔單止得到別人認同，仲有人感受到你背後嘅理念，
對一個追夢嘅人嚟講，比一切都更難能可貴。

嚟到品牌嘅尾聲，我希望理念能夠繼續延續落去。
我會推出 Final Edition: From Here, To Always。
呢個系列以 「長青百搭」 為主題，集合多年嚟最受歡迎、實用嘅款式，
成為大家生活入面嘅「長青之選」。

就算 FCPlus 暫時落幕，
我都希望呢份舒適同自由嘅精神，
可以一直留喺你哋嘅衣櫃，繼續陪你哋過生活。

我相信，「再見」係「會再見」。
呢個結束，只係另一個開始。
未來嘅計劃暫時未有，
我諗會先休息一陣，然後再出發。

衷心感謝大家 11 年以來對 FCPlus，同對我嘅支持同信任
多謝你❤️

Forever grateful,
Makayla